DATE AL IMPERIU
Lo más cómodo ye siguir la corriente

La selmana pasada, la parte contratante de la primer parte, ello ye, Izquierda Xunida, de Xixón, asombrábanos a toos cola proclamación de qu’en Xixón diba haber unes ordenances tocántenes al usu la llingua asturiana na parte contratante que correspuende a la primer parte, ello ye, l’Ayuntamientu. Y que diba ser col alcuerdu de tolos grupos políticos.

Vaya per delantre que nun soi un masimalista del too o nada y que nun soi de los que refuguen les migayes por cuenta garrar un pan que nun ta claru que garre. Prefiero’l pan enteru, ta claro, pero si la fame aprieta, tamién garro les migayes. Ensin quitar el güeyu al pan.

Ye por eso que me paecen bien les famoses ordenances, pero... Siempre tien d’haber un pero. ¿De qué sirven unes ordenances pa defender un idioma con un 99% d’analfabetos? Ello ye que la mayor parte los ciudadanos qu’a les ventaniyes de la Casa Conceyu aportamos, vamos más que nada a rellenar o a que nos rellenen papeles. ¿Y cómo va ún a rellenar papales n’asturianu si ye analfabetu?

Porque esti ye un país d’analfabetos. Non por culpa los ciudadanos, que tampoco van dexar lo que tengan de facer pa enllenar los cursos de llingua nun “furor patrióticu” enxamás vistu (por otra parte ye lo que pretenden dende l’alministación, qu’estudiemos asturianu “por amor” ¡qué romántico!, pero d’esto yá falaremos otru día), sinón porque l’asturianu ye, por siguir colo dicho enantes, les migayes del sistema educativu: una asignatura “maría” optativa. Nun lo sé, pero apostaría a que nin siquier los neños que la estudien seríen quien a escribir asturianu con un poco de curiosidá. Los qu’escribimos nesta llingua tuvimos d’aprendelo como lo quier el gobiernu, “por amor al arte”, y los que nun tienen tiempu o gana, nun se van poner a aprender a escribir una llingua “que nun renta”. Si la xente sabe escribir en castellanu (con mayor o menor traza) ye porque tuvieren llargos años d’aprendizaxe.

Ye más, yo conozo a munchos asturianu-falantes que nun son quienes a escribir n’asturianu, que cuando escriben tienen de pasar al castellanu porque ye lo que saben escribir, lo que-yos aprendieren. Igual que conozo a xente que siempre diz Cimavilla, pero siempre escribe Cimadevilla. La educación fae muncho.

El resultáu de too esto ye que’l 0’4 de la población ye analfabeta total y probablemente un porcentaxe paecíu ye alfabeta n’asturianu. Con estos porcentaxes, la xente que s’allegue a la ventaniya siguirá pidiendo los papeles en castellanu o nin siquier se-y ocurrirá pidir esos que l’Ayuntamientu escuenderá tres d’un caxón por si llega dalgún “chifláu” como yo, que los pida n’asturianu.

A la fin d’añu, sacarán a rellucir les estadístiques y dirán daqué paecío a: “Namás el 0’01 de la población pidió papeles n’asturianu”. Y otra vez más, el PSOE descoyonaráse de la reivindicación llingüística.

La verdá ye que coses nel mundu pasen abondes como pa escribir tolos díes. Pero nun tolos díes tien ún ganes.

Ta claro que les cuestiones llingüístiques llevanten munches pasiones, nun hai más que ver como se tira tol mundu a dicir lo que piensa de “la guerra les llingües” cada vez qu’una noticia apaez nun periódicu cualquiera. Y hasta nesti mesmu humilde blog. Enxamás hubiere tanta polémica como col últimu “post”, y too porque dixi que ta bien echar les culpes al gobiernu, que per otru llau tien munches, pero que nun hai qu’escaecer que nós tamién tenemos culpa no que pasa n’Asturies últimamente.

Pero vamos a lo que vamos. Dígolo per delantre: soi fumador. Por eso voi escribir güei sobre esti tema, nel Día Internacional Ensin Tabacu. Recálcolo: soi fumador; y añado: toi fartu de tantu mentecatismu.

Nun voi discutir si fumar ye bueno o malo, magar tenga les mios duldes en que seya, non malo, sinón tan malo como lo pinten, que paez qu’ún va echar un pitu y ta condergáu a la muerte. Tampoco voi discutir si ye más malo pa la salú que la contaminación que tragamos con namás respirar nes grandes urbes o la mierda cola que nos enllenen la comida. Nun va d’eso esti escritu.

De lo que toi fartu ye de que nesti, como n’otros asuntos, la ideoloxía imperante, la “buena”, la del “Imperiu” al que nos damos, nos trate como a idotes descriteriaos.

Bono ta que nos alviertan de lo que nos pue pasar si decidimos fumar. Bono ta que se faiga por preservar la salú de la xente qu’entá nun tien madurez abondo pa decidir. Hasta equí, val.

Pero’l colmu ye la llexislación que quier protexete de ti mesmu, como si la xente fuera bobo. Siempre s’entendió la llei como un sistema de proteición de derechos escontra otros. Ello ye, una llei pue impedir que dalguién mate a otra persona, pero nun pue impedir que se mate a sí mesmu, si quier. De la mesma forma, una llei antitabacu pue impedir que yo perxudique a otros por fumar, nel casu de que se m’ocurriera, que nun se m’ocurre. Ye por eso que a naide, pienso yo, nin fumador nin non fumador, se-y pue pasar pol maxín que prohibir fumar n’espacios cerraos (l’autobús, un hospital, el tren, etc.) que compartan fumadores y non fumadores (incluyíos neños), tea mal. Agora bien, esta persecución que se fae pa que dexemos de fumar los que fumamos porque tenemos de ser cadáveres sanos, que va acabar por prohibir fumar hasta na casa d’ún, ¿a qué vien? Yá soi mayorín y yá toi enteráu de que me pue entrar un cáncer si fumo, pero quiero siguir fumando ¿por qué nun puedo?

Y cuento esto porque l’otru día fui por tabacu y entré nel estancu fumando un pitu. En seguida, l’estanqueru díxome que nun podía entrar nel estancu fumando. Yo quedé plasmáu, imaxinen que nun se pudiera beber nun bar. Dempués, en llegando a casa, y pa nun volver meter la pata, miré les lleis antitabacu d’otros llaos, que nos llegarán. Y digo yo, si lo que quieren ye que dexemos de fumar, ¿por qué nun declaren el tabacu droga illegal o por qué nun ponen la caxetiya a 12 euros?

Que se preparen los gordos y los feos, que me paez a mi que somos los prósimos (confiésolo, amás de fumador soi gordu y feu). Empezarán dicir que o nos operamos o nun podemos salir a la cai, porque afectamos la salú mental de los que nos ven.

Esto de tar retiráu de la política tien que, de xemes en cuando, atópeste con antiguos collacios de partíu. L’otru día atopé con Fede. Nun se llama Fede, claro, pero ún de les gracies que tien internet ye l’escondese y poder así dicir coses qu’igual con nomes y apellíos al aire nun diríemos, que pa eso nos educaren. Amás, como diz el dichu, dizse’l pecáu, pero non el pecador.

El casu ye qu’atopé con Fede y echamos una parrafadina. Si nos atopamos na cai siempre paramos un poco y reburdiamos del mundu y lo tristayo que ye esto de ser asturianista. L’otru día, nun sé por qué, amás de pola muyer, pola que siempre pregunto (por educación, nun vayan pensar mal) entrugué-y pola fía. Aquella rapazuca que malpenes andaba de la que yo la conociere, ye, polo visto, una moza de yá catorce años.

-Entós yá va al Institutu, ¿non? –dixi inocente de mi.

-Pues claro, ta yá en segundu –retrucóme Fede con ciertu arguyu paternu- y estudia mui bien.

-¿Y qué tal-y va col asturianu? –dixi entá más inocente y más que nada porque de la tristaya situación de la nuestra llingua avezamos falar si nos topamos.

-¿Col asturianu? –dixo Fede como si-y chocara.

- Sí, col asturianu, nel institutu estudia asturianu ¿non?

Fede mirome en tientes, como si tuviere un pocu chifláu.

- ¡Qué va, va a alemán!

Yo mirélu con plasmu. ¿Qué me taba diciendo, que la fía d’un veteranu asturianista diba a alemán? Entós Fede esplicóme unes cuantes coses que nun sabía. Lo que ye tar desconeutáu. Voi ponelo como si me lo soltare en plan mitin, por abreviar, pero en realidá foi un diálogu.

-La neña va alemán porque ye una manera asegurar que va tar nuna clase normal, inclusu bona. Al paecer, el francés nun lo asegura del too. A asturianu va la puxarra y apuntar a la neña a asturianu ye garantía de que-y va tocar nuna clase bandarres. Nin siquier fizo la prueba de si eso yera cierto o non, la so muyer investigó na escuela quien se diba apuntar a asturianu nel institutu y yá en primeru apuntó la neña a alemán. Así, amás, aseguraba que-y tocara con dalguna amiguina.

Dempués vinieren les disculpes.

-Pero nun pienses que soi yo namás el que faigo esto. La mayestra d’asturianu de la mio fía en sestu tien un fíu nel institutu y va a francés, y polo que sé, nun ye la única. Hasta conocíos andechos mandaren a los fíos a alemán o francés, y escritores en llingua bien conocíos...

Nun sabía, la verdá que nun lo sabía, pero pola boca de Fede salieren unos cuantos nomes que nun voi dicir equí. Yo taba al tantu de la pelea de Bermeyu col institutu la fía porque salió nos periódicos y pensaba que si nun había más casos que salieran nos papeles ye porque nun había más casos, non porque los militantes asturianistes renunciaren en silenciu.

Marché triste pa casa pensando nes pescadiyes que se muerden el rau. Los macarres apúntense a asturianu, los asturianistes renuncien a meter a los sos fíos, la puxarra faise col cotarru, naide non asturianista va arriesgar viendo l’exemplu de los asturianistes. Vamos, de pena.

Namás me queda dicir que, visto esto, los neños que siendo bonos estudiantes se meten n’asturianu, merecen un monumentu. Esos sí que son héroes.

Viaxar ye una vacuna escontra’l nacionalismu. Los nacionalistes nun faen otro que mirase l’embeligu. Nun mundu que va camín de la globalización, los nacionalismos nun tienen sentíu.

Quiciás usté que cayó per esti blog y llee estes ringleres sintió dicir frases como estes. Igual hasta-y les dixeren como argumentu irrefutable de que la so posición yera equivocada. A mi, polo menos, pasóme.

Y la verdá que nun ye lo mesmo viaxar qu’entender, nun hai más que mirar a lo lloñe pa querer muncho’l propiu embeligu y nun mundu que va camín de la globalización nun queda más remediu que ser nacionalista. Vamos a too ello.

Cuando daquién diz que viaxar ye una vacuna escontra’l nacionalismu, aparte de que miente, nun amuesa otro que que tien espíritu de turista. Ser turista y ser viaxeru nun ye lo mesmo. Un turista visita llugares, saca fotos, patea piedres, pero nun s’entera de nada, pue tar visitando l’Acrópolis como pudiera tar repanchigáu na playa. Lo único que quier ye poder cuntar a los sos amigos, pa la so envidia, el gran viaxe que fexo, y poder acompañalo con fotos y videos nes que siempre aparez él (pa demostrar que tuvo ellí). Lo interesante nun ye Machu Pichu, lo interesante ye qu’él tuvo en Machu Pichu. En nengún momentu s’interesará por entender lo que tien al so rodiu, tien abondo con comprar un recuerdu pa usalu de ceniceru en volviendo a casa. Un viaxeru ye otra cosa. Y si s’anda pel mundu con espíritu de viaxeru, ún ve que’l mundu ye fantásticu porque ye diversu y que lo interesante de los llugares que visita son aquelles coses que nun se ven. L’Alhambra de Granada nun ye interesante por ser un montonáu de piedres bien puestes que lleva sieglos esperando la mio visita. Y el conocimientu d’eses coses fai apreciar muncho más les que tienes en casa, que son l’arguyu particular, la contribución del mio país a esa diversidá.

Per otru llau, nun hai más que viaxar pa dase cuenta de qu’una de les munches variables que puen dividir les sociedaes ye ser una sociedá vencida o una sociedá arguyosa. Una sociedá vencida reniega de lo suyo, una sociedá arguyosa mima lo suyo. Porque, ensin quitar importancia a tolo que’l mundu nos pue aportar, lo d’ún ye lo d’ún. Ye más, cuando un país naz de manera artificial, lo primero que fai ye crear una identidá de la que sentise arguyosu, daqué a lo que s’agarrar como lo d’ún. Lo d’ún, que nun escluye lo de los demás, tolo contrario. Esto nun va facer del llugar en cuestión más ricu o más probe, meyor nin peor, pero sí únicu.

Y por último, eso que llamen globalización nun ye otro qu’un montaxe económicu uniformador. Pa la industria lo cenciello ye economía y tolo que se pueda simplificar ye económicamente rentable. Pero económicamente rentable nun tien por qué querer dicir meyor. Evidentemente, si toos calzaremos el mesmu númberu de zapatu, la industria zapatera vería reducíos los sos costos de producción, pero eso nun quier dicir que que toos tengamos el mesmu llargu pie seya bono, nin siquier más divertío y, por supuesto, que nos faiga más felices. Porque ye menester recordar que la esencia de la vida ye ser feliz y que tener perres en bolsu ayuda muncho, pero ser ún mesmu más. Y lo uno nun ta reñio colo otro. Los viaxeros, non los turistes, sábenlo bien, ún pue pertenecer a una sociedá vencida, entregada al mercadéu global y dientro esi mercadéu a la cultura global, y ser un probetayu disgraciáu. Que-yos lo entruguen a cualquier pueblu colonizáu d’África, por exemplu. O tamién pue pertenecer a una cultura arguyosa y tener un bon nivel de vida. Que-yos lo entruguen a los noruegos, por exemplu.

Lo que son les coses de la vida, delles veces nun sabes nada d'un asuntu na vida o d'una persona n'años y otres en pocos díes asáltente varies veces.

Vengo d'enterame de la segunda vuelta de tuerca con esto de la educación billíngüe (n'inglés y castellán, por supuestu). A los neños que tán metíos nesa seición organízase-yos un viaxe a Inglaterra.

Otra vez más de lo mesmo, l'envoltoriu paez mui guapo, pero otr vez apaez la:

DISCRIMINACIÓN

El casu ye qu'a estos críos organízase-yos un "viaxe d'estudios" o un campamentu d'inmersión, o coses asemeyaes, too particular, tolos críos que nun tean dientro del selectu grupu, magar seyan del mesmu nivel tán escluyíos. Bueno, a toos non, porque si llega'l casu de qu'hai que rellenar places "invitase" al viaxe a otros neños pero cola condición de que "seyan alumnos modélicos", bandarres, repetidores y malos estudiantes, abstenese.

La cuestión ye que quien ye "modélicu" y quien non decídelo'l centru nel qu'estudien. Los padres y los críos nun pinten nada nesa seleición. Col escurantismu qu'arrodia toles aiciones vergoñoses, "invitaciones" van y vienen. Los padres que nun tengan esos alumnos modélicos nin siquier s'enterarán d'esi "viaxe d'estudios". Too semiclandestino, que nun s'entere naide qu'igual hai daquién que monta la bronca.

¿Y qué pasa si'l to fíu nun ye un bandarra, pero tampoco una llumbrera? Si ye de los que necesiten una bona ayuda, por exemplu un viaxe a Inglaterra. Pues "ajo y agua", nin siquier te vas enterar.

Claro que si'l to fíu nun ye una llumbrera, o si ye un bandarra, siempre te quedará apuntalu a asturianu, que ye onde van los que nun valen pa otra cosa. Porque los billingües nun estudien eses coses, ¡faltaría!

Dalgo sintiera yo del tema, pero foi esti fin de selmana, qu’atopé a un amigu al que diba un tiempu nun via, que m’enteré d’una nueva victoria de la escuela de Chicago y los sos amigos. El mio amigu ye mayestru y nun m’alcuerdo cómo acabamos falando de la situación de la enseñanza. Nun sé por qué tolos mayestros acaben falando siempre de lo mesmo.

El casu ye que me cuntó que nel Institutu nel que trabaya taben colo de la “Seición Billingüe”. Al paecer, en munches escueles ya institutos d’Asturies (y supongo que más allá) ta entamándose a dar clases non d’inglés, sinón n’inglés. Ye una enseñanza voluntaria y apúntase’l que quier, pero tienen munchu ésitu, porque los padres d’anguaño tán mui enfotaos en que los sos neños sepan l’idioma l’imperiu. La presentación ye mui guapa, vamos, la cosa tien un envoltoriu de munchu cuidáu, pero ¿qué s’escuende dientro l’envoltoriu?

La segregación.

Yá de la que diba yo a escuela, a falta de facer clases colos llistos y clases colos bobos, poníase a unos p’alantre y a otros p’atrás. Tamién tengo oyío a mayestros dicir que los “malos estudiantes” perxudiquen la educación de los “bonos estudiantes” y que a lo meyor una solución yera facer seleición. Ello ye, segregación. De toles formes paez ser que, a lo menos na educación pública, esto nunca nun se fizo, seguramente porque separar “burros” y “llistos” en clases distintes nun ta bien visto y porque a ver quien yera’l que diba dar clase a los burros.

Urxía una bona disculpa pa separar “burros” y “llistos”. Y el séptimu de caballería llegó al rescate en forma non de Xeneral Custer sinon d’idioma inglés.

Cuntábame’l mio amigu que, de mano, la oportunidá presentase pa tol mundu, pero a lo menos de momentu, namás un cursu pue ser la “Seición billingüe”. Así que nunos sitios faese la seleición d’una manera y n’otros d’otra. De mano, tol mundu pue dir a esa clase, a lo menos teóricamente, pero la realidá “saca” a dellos alumnos d’ellí: los padres nun lo piden, pasen, nun tienen nivel mínimu d’idioma y/o nun s’atreven... El casu ye que los neños d’esa clase son, mayormente, bonos estudiantes. Pero si dalgún hai que nun lo seya, l’entuertu esfaese nos años vinientes, porque nesi cursu nun s’almiten repetidores y, nel casu de que dalgún repita, la so plaza nel siguiente cursu ocúpala ún/una que lo solicitare y quedara fuera y pasara de cursu. Si la clase nun yera la de los “empollones” en primeru, en segundu yá de xuru.

Siempre habrá bonos estudiantes qu’así y too nun faigan el “billingüe” pero tolos del “billingüe” serán bonos estudiantes. Yá lo toi viendo, los profes peleándose por dar clase a esos y dexando a los interinos los burrinos.

A esto añádese’l fechu de que paez ser que tar na “Seición billingüe” y estudiar asturianu ye incompatible. A dellos padres dixéren-yos que si aneciaben en querer como optativa asturianu, los sos fíos nun podíen cursar el billingüe. Nel billingüe namás se pue estudiar alemán o francés.

Vamos, apartheid n’estáu puru.

Javier Neira ufiértanos güei domingu otru de los artículos-mitín a los que nos tien avezaos nos caberos tiempos.

Dende la so conversión a la fe verdadera, la de Milton Friedman, tien agarrao l’estilu de la secta. Ye una secta abondante nestos tiempos y que tien en Aznar el so másimu esponente políticu y a Jiménez Losantos el periodísticu nesta parte del mundu que se llama España.

Los principios que mueven a esta xente son iguales si se trata de políticos que de periodístes, la única diferencia ye que los politicos guarden les formes d’educación verbal, los periodistes non, prefieren esi vieyu dicir castellán de “al pan pan y al vino vino”.

Son estos los principios: Los ciudadanos son llibres de facer lo que quieran y l’Estáu al que pertenezan nun tien por qué metese en nengún aspeutu de la so vida. El Estáu nun ta más que pa marcar unes regles de xueu mínimu (lleis) y garantizar les condiciones necesaries pal so cumplimientu. Visto la mengua d’obligaciones del Estáu, nun necesita de munchos ingresos, de lo cual se saca que l’aportación n’impuestos debe ser mínima. Coles perres en bolsu, que caún les funda no que más-y paeza. La otra cuestión importante nos llugares onde asocediera ye que nun se xustifica un cambiu nes estructures xenerales del Estáu a nun ser que seya pa beneficiu propiu. Nel casu d’España, en que sí se da’l casu, cualquier rellumu d’independencia d’una parte o cambiu del estatus hexemónicu de la llingua castellana, considerase un ataque nefastu que nun da más qu’a disgracies.

Esta ideoloxía tien odiu por tou tipu d’estorvisa a l’aición del capital priváu. D’ehí que los sos grandes enemigos d’anguaño (esapaecida la Unión Soviética y adlateres) seyan Fidel Castro y Chávez. Ta claro que nengún d’esos dos rexímenes son un paradigma pa naide, pero los partidarios d’esta ideoloxía nun dicen que los sos planteamientos llevaren nel so día a les dictadures sudamericanes (Pinochet, Videla, etc.) o a l’actual guerra d’Irak, que tampoco lo yeren/ye.

Los periodístes d’esta cuerda distínguense, Neira nel artículu de güei, dicíamos, por nun cortase al falar. Nel artículu del señor Neira, por exemplu, vese na facilidá que tien pa llamar a una ministra Maleni y a otra Karma. Tampoco nun tienen problema por non criticar xestiones, sinón por descalificar a la xente según la consideren una inculta por nun saber dicir unes provincies, un aprovecháu por facese un pisu o un inventor de curricula. Lo que pue ser verdá y nun tener perdón, pero que nada vien a cuentu.

Los periodistes d’esta cuerda, Neira nel artículu de güei, ven a los que nun opinen como ellos como oveyes que siguen al so pastor, que nun se distingue más que en ser un pocu más llistu. Ye de suponer, por estensión, que los votantes de les oveyes son más oveyes tovía. Nun se llibren tampoco los siguidores del bandu opositor si deciden arrequexar a les mayores lluminaries que, al so entender, hai nél. Ellos son la verdá y ellos namás nun son oveyes.

Los siguidores d’esta cuerda, Neira nel artículu de güei, piensen que si’l gobiernu lo fae mal, lo normal per otru llau siendo como son una panda d’inútiles oveyes, tola culpa ye d’él y podrán ponelu a parir; pero que si les coses van bien nun será por ellos, sinón porque la ideoloxía de la llibertá (la suya) funciona hasta en circustancies alverses. Resume: vaya bien o vaya mal, los ministros y el presidente son unos inútiles y unes oveyes.

Los siguidores d’esta cuerda, Neira nel artículu de güei, p’acabar, piensen que los políticos fabriquen problemes onde nun los hai y que nun s’ocupen de los verdaderos problemes de la xente, que son la hipoteca, el trabayu, los precios, etc. Pero tamién piensen que si se ponen a facer daqué namás se dediquen a romper España. Pero si’l qu’España se rompa nun ye un problema que tien la xente y a la xente nun-y preocupa, y si los verdaderos problemes los resuelve’l lliberalismu, entós ¿ónde ta’l problema? Si’l lliberalismu, con o escontra’l gobiernu, funciona, ¿qué más-y da a la xente? A la fin, la so hipoteca, el trabayu, los precios, etc. resolverálos el lliberalismu nuna España entera o nuna España partida. Y vivirán felices colos problemes resueltos n’España o no que resulte.

¡Hai que ver lo que pue dicir la xente!

España se rompe. Esi paez ser el glayíu de guerra de les fuerces conservadores del Estáu y col que Rosa Díez, la nueva heroina pa munchos, llegó al congresu los diputaos.

La Nueva España de güei, martes 11 d'abril, traenos un par d'artículos sobre la cuestión. Puen vese equí:

http://www.lne.es/secciones/noticia.jsp?pRef=2008041100_52_625858__Opinion-interesa-PSOE-independencia-algun-territorio

http://www.lne.es/secciones/noticia.jsp?pRef=2008041100_52_625850__Opinion-Lenguas

Si comentara los dos esti escritu podría facese mui llargu, polo que voi obviar el primeru, que basa'l so argumentariu en que'l PSOE debería tar a la escontra la independencia de cualquier parte d'España porque nun-y convién, que perdería les eleiciones no que quedara d'España. El propiu argumentu diz muncho del que lo escribe. Profundu pensamientu políticu.

Pero ye que l'otru ye una ayalga.El señor Alonso aprovecha una campaña de promoción llingüística pa facenos ver los peligros de salir del camín. Nun pensaba yo que quedara tantos "fans" de la "España, una, grande y llibre", pero vaya si queden.

Entama'l señor Alonso que nun sabe a cuentu qué l'Ayuntamientu funde perres nuna campaña así, porque tol mundu sabe que los guisantes n'Asturies llámense arbeyos. Bueno, más o menos (lo de tol mundu). Buen entamu pal artículu, entamar con una mentira. O esti home nun tien fíos o ye ciegu. Nun hai más qu'oyer a los críos cómo falen pa dase cuenta de que la so afirmación ye falsa y nun hai más que dir al supermercáu o mirar la carta d'un restaurante pa ver que los "guisantes" abonden y los arbeyos anden esapaecíos. Pero a la fin diz de lo que de verdá se trata "no hace falta ninguna campaña de normalización del asturiano" Non, claro, l'asturianu ta nuna situación mui normal, la más normal, la que tien de ser pa él: que muerra d'una vez.

El problema, al entender del señor Alonso, ye qu'estes campañes acaben en inmersiones llingüístiques, que polo visto son mui males. Son males malísimes si les faen los catalanes, los valencianos, nun digamos los vascos y demás. Pero son mui bones si les faen los castellanos. El castellanu nun llegó en Sudamérica a ser la llingua más estendía porque tener "buen rollito", fízose con inmersiones llingüístiques. Y los neños asturianos, por nun dir a otros llugares, sufren inmersión llingüística dende'l primer día que prenden la tele o pisen la escuela. Pero yá se sabe, una cosa ye la mio inmersión llingüística y otra mui distinta la tuya.

¿Y cuála ye la conclusión de too esto? Pues claro, qu'España se ruempe. Lo que ye mui malo, según esti almirador de Rosa Díez, la nueva Agustina d'Aragón.

Claro qu'estos defensores de la España una y llibre (lo de grande ye imposible defender anguaño) nun espliquen enxamás por qué'l matrimoniu del Estáu español tien de ser indisoluble, nestos tiempos en que tol mundu aceuta'l divorciu como manera civilizada de disolver un vínculu afectivu yá nun deseyáu.

Porque una cosa ye defender que taría bien que'l matrimoniu español durara munchos años más, (Plantegáu nestos términos yo apúntome) y otro mui distinta ye'l o yes mia o de naide y nesi casu te mato.

Si España, como un matrimoniu, se tien de disolver, porque una les partes yá nun quier esi matrimoniu, habrá que lo aceptar. O eso o obligamos a esa parte a esapaecer (la matamos) o a tar nuna situación que nun quier, lo que siempre lleva a una situación esplosiva.

Claro que lo último ye lo que dexa bien a les clares tol pensamientu del señor Alonso sobre la cuestión idiomática: "Aunque ese idioma sea tan universal como es el castellano, que deberíamos festejar a diario. Con cohetes." ¿Por qué deberíemos "festejar" el castellano y non l'asturianu? Bueno, l'otru día escribí sobre ello. Pero'l resumen ye fácil: porque ye'l míu -diría'l señor Alonso, l'únicu que hai que fomentar pa que nun se pierda, l'únicu con "patente de corso" pa facer inmersiones llingüístiques (o hai que recordá-y a esti señor que cualquier ciudadanu européu que lleve'l so fíu a una escuela pública española tien que dar por bueno que al so críu o cría-y la faigan).

Si hai daquién qu'entre y llea esti solitariu blog, recomiéndo-y llea l'artículu que José Ignacio Gracia Noriega escribió en LNE sobre'l valir económicu d'una llingua. Pue atopase equí:

http://www.lne.es/secciones/noticia.jsp?pRef=2008040400_42_623612__Asturias-valor-economico-lengua

Y recomiéndolu porque debe ser difícil atopar tantu sentíu obtusu al querer ver namás lo que se quier.

Qu'una llingua ye un bien económicu ye difícil de negar. Y que la llingua con más valir económicu ye la del Estáu que "rixe" la economía más fuerte del planeta, tamién. Como'l propiu Gracia cita de Nebrija, la llingua ye compañera del imperiu.

Por eso precisamente queda ridículo tolo que dempués sigue. Que'l castellanu tien munchos millones de falantes, naide lo dulda, pero nengún d'esos falantes nativos pertenez a un Estáu lider económicu mundial. Si facemos un repasu al G8, veremos que nengún ye un Estáu castellanu-parlante. Con namás dicir que l'Estáu más potente de toos ye la propia España yá se diz too.

Ye por eso que defender la llingua castellana como llingua internacional económica ye ridículo. El castellanu tien munchos valores, pero esi precisamente non. El númberu falantes nun ye bastante y la estensión de la llingua nun pasa de ser una ventaya con respeutu al comerciu colos países iberoamericanos. Lo que nun ta mal, pero nun da pa más.

Por eso imaxinar a un empresariu asturianu escribiendo una carta a un cliente xapones en bable ye tan ridiculo como imaxinalu faciéndolo en castellanu. A nun ser qu'esi empresariu supiera xaponés (igual hai dalgún), escribiría la carta n'inglés, que sí ye l'idioma de los que manden.

El hindi, el bengalí o el xaponés puen tener munchos falantes. Y más que naide'l chinu, pero l'idioma d'intercomunicación ye'l de los que manden (a lo menos pol momentu) y esi ye l'inglés. Nengún de los Estaos castellano-parlantes tien pinta de ser relevu imperiu-económicu, polo que'l castellanu seguirá nel sitiu que ta polo menos demientres los qu'anguaño tamos vivos sigamos na tierra. Más allá, a saber....

Pero'l castellanu ye un idioma tan bonu (o tan malu) como cualaquier otru y los sos valores nun son ser los meyores nin mexar más allá. Los castellano-parlantes tienen de tar arguyosos del so idioma non por otro que porque ye'l propiu d'ellos. Nada más. Eso nun los va convertir nin en más ricos, nin más guapos, pero sí-yos va permitir siguir siendo ellos.

Eso mesmo deberíemos tenelo claro n'Asturies col asturianu, pero non lo tenemos.

Los idiomes tienen valir económicu, la mayor parte d'ellos mui devaluáu o cuasi ensin apreciu, pero esi valir nun ye lo principal. Un idioma nun convierte un pueblu probe en ricu nin viceversa. Nengún pueblu ye probe pol idioma que fala, eso son mitos. Si así fuera, los fineses y los islandeses tendríen de ser mui probes. Tampoco nun pasa lo contrario, los nicaragüenses nun son más ricos porque falen castellanu o los ugandeses por saber inglés.

Qué neciura tienen dalgunos defendiendo'l poder de les perres y los idiomes "grandes" en falantes y dempués emperraos en falar una llingua como'l castellanu. ¡Qué fae'l señor Gracia que nun escribe o fala n'inglés! O ¿Por qué nun escribe en hindi pa tener más llectores?

¿O será que lo único que-y pasa ye que quier tanto a la so llingua que lu ciega la pasión y vela más guapa y llista de lo que de verdá ye?

Somos memoria. Caún de nós ye’l que ye porque alcuérdase. Pola mañana, alcuérdase de ónde ta, alcuérdase ónde ta l'armariu co la ropa, cómo se va a la cocina, cómo funciona'l microondes, quién ye so padre, quién so madre, cómo se llama y así podríemos siguir. Too ello forma la so hestoria, el so ser, únicu magar compartíu con otros en milenta coses.

Lo peor que pue pasar a una persona ye escaecer quien ye. La enfermedá d'Alzheimer ye espantible, sobremanera, porque 'l que la sufre escaez y acaba por nun saber siquier quien ye.

Pero non namás somos memoria ún a ún, tamién somos memoria en conxuntu. Ser d'un llugar ye tener parte la nuestra memoria compartida con otros. Somos d'esti o aquel barriu, d'esta o aquella ciudá, d'esti o aquel país porque compartimos colos demas recuerdos.

Pero los pueblos tamién puen tener Alzheimer, un Alzheimer provocáu y estrañu pa que nun compartan recuerdos colos suyos, pa que los compartan con otros. Así abandonamos lo nuestro polo ayeno y acabamos siendo ellos, animando a los sos equipos, queriendo la so música, lleendo los so llibros, conociendo la so historia.... a el mesmu tiempu qu'escaecemos el nuestru equipu, despreciamos la nuestra música, tarrecemos los nuestros llibros, desconocemos la nuestra historia...

Los romanos yá sabían de esto. Llamárenlo Damnatio Memoriae, condena de la memoria. Día habrá en que nos digan: vosotros enxamás esististis.