Hipócrites o cobardes
Esto de tar retiráu de la política tien que, de xemes en cuando, atópeste con antiguos collacios de partíu. L’otru día atopé con Fede. Nun se llama Fede, claro, pero ún de les gracies que tien internet ye l’escondese y poder así dicir coses qu’igual con nomes y apellíos al aire nun diríemos, que pa eso nos educaren. Amás, como diz el dichu, dizse’l pecáu, pero non el pecador.
El casu ye qu’atopé con Fede y echamos una parrafadina. Si nos atopamos na cai siempre paramos un poco y reburdiamos del mundu y lo tristayo que ye esto de ser asturianista. L’otru día, nun sé por qué, amás de pola muyer, pola que siempre pregunto (por educación, nun vayan pensar mal) entrugué-y pola fía. Aquella rapazuca que malpenes andaba de la que yo la conociere, ye, polo visto, una moza de yá catorce años.
-Entós yá va al Institutu, ¿non? –dixi inocente de mi.
-Pues claro, ta yá en segundu –retrucóme Fede con ciertu arguyu paternu- y estudia mui bien.
-¿Y qué tal-y va col asturianu? –dixi entá más inocente y más que nada porque de la tristaya situación de la nuestra llingua avezamos falar si nos topamos.
-¿Col asturianu? –dixo Fede como si-y chocara.
- Sí, col asturianu, nel institutu estudia asturianu ¿non?
Fede mirome en tientes, como si tuviere un pocu chifláu.
- ¡Qué va, va a alemán!
Yo mirélu con plasmu. ¿Qué me taba diciendo, que la fía d’un veteranu asturianista diba a alemán? Entós Fede esplicóme unes cuantes coses que nun sabía. Lo que ye tar desconeutáu. Voi ponelo como si me lo soltare en plan mitin, por abreviar, pero en realidá foi un diálogu.
-La neña va alemán porque ye una manera asegurar que va tar nuna clase normal, inclusu bona. Al paecer, el francés nun lo asegura del too. A asturianu va la puxarra y apuntar a la neña a asturianu ye garantía de que-y va tocar nuna clase bandarres. Nin siquier fizo la prueba de si eso yera cierto o non, la so muyer investigó na escuela quien se diba apuntar a asturianu nel institutu y yá en primeru apuntó la neña a alemán. Así, amás, aseguraba que-y tocara con dalguna amiguina.
Dempués vinieren les disculpes.
-Pero nun pienses que soi yo namás el que faigo esto. La mayestra d’asturianu de la mio fía en sestu tien un fíu nel institutu y va a francés, y polo que sé, nun ye la única. Hasta conocíos andechos mandaren a los fíos a alemán o francés, y escritores en llingua bien conocíos...
Nun sabía, la verdá que nun lo sabía, pero pola boca de Fede salieren unos cuantos nomes que nun voi dicir equí. Yo taba al tantu de la pelea de Bermeyu col institutu la fía porque salió nos periódicos y pensaba que si nun había más casos que salieran nos papeles ye porque nun había más casos, non porque los militantes asturianistes renunciaren en silenciu.
Marché triste pa casa pensando nes pescadiyes que se muerden el rau. Los macarres apúntense a asturianu, los asturianistes renuncien a meter a los sos fíos, la puxarra faise col cotarru, naide non asturianista va arriesgar viendo l’exemplu de los asturianistes. Vamos, de pena.
Namás me queda dicir que, visto esto, los neños que siendo bonos estudiantes se meten n’asturianu, merecen un monumentu. Esos sí que son héroes.
Esbilla
del.icio.us
Menos la pipa, igualín igualín.
Sé de casos nos que la rapacinos van a asturianu porque "ye fácil" y como se-yos dan mal los idiomes (como'l francés) pues van a asturianu y ye una asignatura menos cola que bregar.
Lo que cuentes ye un poco distinto y enforma ablucante, porque sí que da pena esa "traición" a la militancia pola llingua... qué pena de país (y de paisanos/es)
Ricardo | 27-05-2008 - 12:29:32 GMT 1 #
Doi fe de lo que diz Ricardo, della xente va a asturianu porque creen que ye fácil y realmente ye asina, nun se toma a l'asignatura en serio y ye d'eses qu'hai qu'aprobar porque sí, como relixón (quien la dea), frases como "sólo me faltaba suspender asturiano" o "en asturiano con que digas ye, vaques y prau te aprueban", tán a la orde del día. Polo menos na mio esperiencia cuando la cursé.
PD: Por ciertu, agrégote a los mios enllaces que tienes un blogue bien prestosu.
Vity | 27-05-2008 - 13:53:12 GMT 1 #
Dame pena lleer el post y lleer los comentarios. Nun faigais culpables a unos ciudadanos nin a los sos fíos de lo que ye responsabilidá de les alministraciones.
Una llingua perseguida, arrequexada, ensin sofitu oficial de ninguna clas, nun ye mui apetecible pa naide, nin pa los alumnos cargaos de materies y actividaes estraescolare, nin pa los pas que "quieren lo meyor pa los sos fíos", seyan asturianistes o non. Adeprendeer inglés, pueme abrime puertes llaborales, adeprender gallegu, vascu o catalán puede servime pa aprobar una oposición neses comunidaes. ¿Pa que me val un asturianu ensin oficializar?
¿Pa militar en Andecha?
¿Pa cantar en el chigre?
¿Pa bañame en Verdiciu?
¿Pa fardar que tengo un blog?
La diferencia, el prestixu social, el desarollu y l'espoxigue de la llingua hai que conseguilo al traviés de la reconocencia esplícita d'oficialidá nel Estatutu de Autonomía, son les lleis, la aplicación de derechos y'l cumplimientu d'estos los que-y darán a la llingua un futuru.
Puedo falar astuianu fasto polos coldos, pero demientes la llingua nun seya oficial soi un especimen, un raru o un románticu. Seré un ciudadanu con derechos cuando l'Estáu reconoza que los mios derechos a la llingua propia son los mesmos que los de los falantes de les otres llingües.
Heinrich | 27-05-2008 - 14:45:53 GMT 1 #
Comunitarismu otra vegada??? Los ciudadanos son los responsables, les alministraciones nun tienen nenguna culpa...
Ye como dir a la sanidá privada o a les monxes en cuenta d'a la pública. Si la xente que val, abandona, entós namái que queda la puxarra a la que nun-y queda otra. La culpa nun la tien Areces (tienla de munches otres coses, sí) pero non d'esto.
L'home que lleva Fede por nomatu ye una puxarra humano, un hipócrita... Ye como estos politicastros americanos que s'escandalicen pol matrimoniu gay, les infidelidaes, les mamaes de la Lewinsky y llueu van de putes, da noxu la xente asina.
Esti ye'l problema del asturianismu, que nun hai compromisu, que nin la xente asturianista cree'l so propiu discursu... ¿Cómov amos pretender qu'unes alministraciones lu aceuten, si nin lu interiorizamos nós? ¿Cómo vamos a pretender que'l restu de la sociedá pase per un camín que nin pasamos nós per él?
A min la única razón que me val pa xustificar que los tos fíos nun estudien asturianu, ye que nun tán n'Asturies.
¿Cuántos nun faen/facemos por vivir n'asturies una vida 100% n'asturianu? ¿Cuántos renuncien al asturianu pa falar cola xente de les tiendes, col médicu o colo que seya? Esa ye la primer reflexón, de la xente que nun fai por vivir 100% n'ast vien la xustificación a estes práutiques...
embaxador | 27-05-2008 - 15:03:51 GMT 1 #
La defensa de los derechos políticos, sociales y nesti casu llingüísticos, ye eso, defender un derechu, facer por algamalu, esixílu y facelu aplicar y respetar, que ye lo que tamos faciendo equí; y lo que fale o faiga ca ún nel so cuartu ye problema d'elli y un derechu tamién. Les miles de persones que defenden a diariu el derechu a la llingua propia tendrá, si lo facemos posible, el derecho d'exercelu o non sigún yos pete. Les que tan obligaes a velar y facer cumplir esi derechu son les alministraciones y los poderes públicos.
Nesti casu oficalizar l'asturianu ye un deber de les instancies del Estáu pa ufrir a los ciudadanos el derechu a facer eleición de la llingua que quieren emplegar. Unos fadranlo y otros non, esi ye'l so derechu. Les alministraciones son les obligaes a facer rialidá esi drechu y les depositaries a facer posible la eleicion en toles estayes sociales, polítiques, xudiciales, de la enseñanza, del accesu a los medios de comunicación y de les relaciones llaborales. Les relaciones entre los ciudadanos han de ser de llibre eleicion y cíviques. La administración, los servicios, la enseñanza, la xusticia y los centros de trabayu tienen que poner los medios pa que esa eleición pueda facese y eso faise con midíes llegales.
Nun hai nesti país colectivu más criticáu que'l movimientu de vindicación llingüística (onde unos sedrán asturianistes y otros non), si nun ye per un lláu ye per otru, si nun ye pola derecha lliberal ye pola izquierda progresista.
Termino, esixí-y a un asturianista, o a un asturianu, que "viva 100% n'ast", paezme que ye lo mesmo que pretenden pero al revés, los de priscast. y los de la F-SOCIAST.
(Nun revisé'l testu, perdóname si se me foi la man n'alguna fras).
Heinrich.
Heinich | 27-05-2008 - 16:54:38 GMT 1 #
Ye que si me dan como opción estudiar alemán o estudiar asturianu yo téngolo claro (alemán, por supuestu). ¿Por qué nun se pueden estudiar les dos?
home ho | 27-05-2008 - 17:08:13 GMT 1 #
Home oh - ¿Y si te dieren la oportunidá d'escoyer l'asturianu como llingua vehicular con una de les materies en castellán?.
Oficilidá: Voluntaria pal ciudadanu, d'obligada ufierta per parte l'alministración.
Heinrich | 27-05-2008 - 17:55:20 GMT 1 #
Falten agalles y compromisu. Ehí van dos exemplos REALES:
1) Un grupu xente foi cenar a un restaurante. Faláron-y amestao al camareru y ésti encaróse con ellos alvirtiéndolos que "falaren bien" pa dirixise a él. Callaron como afogaos, cenaron, pagaron y colaron.
2) Una rapaza entró nuna llibrería. Faló-y amestao a una dependienta y ésta empecipió a reíse polo baxo y a mirar cómplice a otru dependiente que taba con ella. La clienta miróla entientes y espetó-y
--¿Pués dicime qué ye lo que te fai tanta gracia, mocina?--
La dependienta empezó a ponese collorada, afogó les risines nel intre, atendióla y nun gorgutó. Y el so compañeru de trabayu púnxose a mirar pa otru llau despistando.
Y puedo ponevos más casos que sé de xente que se fai valer y recular a más d'ún.
Munches hosties de les que nos tán cayendo tamos ganándoles a pulsu, pola nuestra falta de compromisu y de coherencia colo que planteamos.
El xanu\'l caborniu | 27-05-2008 - 19:20:46 GMT 1 #
Heinrich, nesa entrada ¿quién-y quita la culpa a l'alministración y al gobiernu?
Ricardo | 27-05-2008 - 21:44:18 GMT 1 #
Naide Ricardo, pero les actitues personales son de ca cual y dignes de tol respetu, otra cosa son les oficiales.
Nun tengo que recordate los insultos, les humillaciones y les hosties que a reglazu llimpiu llevaron munchos durante la dictadura por falar n'asturianu, querer cambiar agora d'un plumazu la socioloxía, cuando dende les alministraciones (otra vegada l'alministración) siguen faciendo lo mesmo: discriminación, prepotencia, chancia, negación, identificaciones (güei "la pita" de la Xunta danos otru exemplu), presiones, manipulación... ye vivir nun mundu irreal. La xente ye ello y les sos circunstancies, a quien hai qu'esixí-y falar n'asturianu y facer por que los ciudanos lo falemos tamién, y lo deprendamos, porque naide ñaz sabíu y la enseñanza ya sabemos en que llingua ye, son les Alministraciones Públiques y los muérganos del poder.
Heinrich | 27-05-2008 - 22:06:02 GMT 1 #
Como facedor del artículu, quiero dicir que toi d'alcuerdu con que ye'l gobiernu el responsable másimu. D'eso nun tengo dulda.
Pero fixi l'artículu porque me llamó l'atención el fechu que me pasó con "Fede".
Pienso yo que caún de nós tamién tenemos la nuestra responsabilidá. Pequeña, si se quier, porque pequeños somos, pero tenémosla. Y si renuciamos a ella...
Per otru llau, los nomes que me dixo "Fede" son unos pocos, magar que llamativos. Supongo qu'hai otros que nun funcionen así. O polo menos eso quiero creyer. Supongo qu'habrá más Bermeyos o xente que nun tuvo problema nin disgrció al so fíu/a nun institutu por apuntalu a asturianu. Supongo que los asturianistes manden a los sos fíos a clase de llingua, ensin qu'ello tenga de ver, como dicía l'otru, que nun puedan aprender alemán, pero si hai qu'escoyer...
Supongo, claro, solo supongo.
Pero ta claro, insisto, el que fai la nuestra llingua inútil y el que la ta matando, ye'l gobiernu, neso toi d'alcuerdu.
Saruman | 27-05-2008 - 23:09:21 GMT 1 #
Voi dicite dalgo más, con tol afeutu Saruman, si yo toviera fíos nun los mandaría a la clas d'asturianu qu'aperiaren los nuesos democratísimos gobernantes, y per dos coses mui cencielles. Una, porque nun quiero que pierdan el tiempu, la segunda porque nun quiero combayar pa procurayos un llaváu de cara de lo "muncho que fan pol asturianu". El día, y esto va ser a non muncho tardar, que se reconoza la oficialidá de la llingua dafechu, que se pueda entrar nel sistema educativu en primaria y salir pela Universidá col asturianu como llingua vehicular, non sólo matricularía a toos los mios fíos, sinon que tamién lo fadría yo. Fasta entós pa xugar... el recréu, que la clas ta pa otres coses.
Heinrich | 27-05-2008 - 23:28:12 GMT 1 #
Y na llingua vehicular... tendría duldes... yo creo qu'escoyería castellán como llingua vehicular, yá ves. Otra cosa ye lo que pasa agora, que nun tienes opción ninguna.
Por ciertu, si me pasa eso a min en restaurante, yá mos vienon a min y a tola xente que conozo, hai que saber tar de cara al públicu.
Home ho | 03-06-2008 - 19:45:24 GMT 1 #