DATE AL IMPERIU
Lo más cómodo ye siguir la corriente

El Alderdi Eguna d'esti añu dexonos dos estampes interesantes y contradictories.
Per un llau, los del EAJ-PNV sacaren les pates fuera del tiestu, quiero dicir, anque lo ficieren con lletres grueses y por mor del so cabréu por perder el gobiernu, llamaren pel so nome al difícil mecigayu que se va instalar nel poder nel País Vascu. Esto de llamar a les coses pol so nome y nun ser políticamente correutu tien munches veces respuestes múltiples, como se vio tamién nos abondosos comentarios al mitin conxuntu Ibarretxe-Urkullu. El calificativu de Zarzuela Española pal nuevu gobiernu llevantó angüeñes. Porque los nuevos inquilinos del gobiernu vascu y de la presidencia del parllamentu nun gusten, contra lo que debiera paecer, de llamase españoles, polo que se ve, ellos nun son eso, ellos son constitucionalistes. Y coime, pensé yo, yo tamién soi constitucionalista, llevo años esperando a que la constitución s'aplique n'Asturies y l'asturianu seya oficial, por exemplu.
Y la verdá, un pactu de gobiernu PSOE-PP nun sé esáutamente como lu calificar. ¿Daquién imaxina un pactu así n'otros llugares, n'Extremadura, por exemplu? Van tener razón a la fin los vascos y va resultar que son d'otra raza, consiguen lo que naide más consigue.
Yo, dende llueu, nun calificaría'l pactu PSOE-PP zarzuela, pa mi sería más bien comedia, pero ye custión de gustos. Y que seya española nun sé por qué tien que cabrear a los militantes d'un partíu que lleven nel nome esi calificativu y a los del otru, qu'avecen presumir d'ello.
L'otru llau ye muncho más sombríu y de difícil, esti sí, calificativu. Porque, ¿cómo calificar a unos individuos que deciden, como si fueren un ser supremu o los vixíes d'occidente, que un determináu gobiernu ye enemigu del pueblu y que lu hai que facer esapaecer a tiros? Podría dicir que son asesinos, chiflaos, illuminaos, y más coses, pero creo que nengún d'estos calificativos los define abondo. O sí, quiciás el d'asesinos. Los asesinos, recuerden los qu'estes pallabres llean, yeren una secta de suicides musulmanes que morríen matando en nome d'Alá. Como los kamikaces. Pero ¡qué va!, agora que lo pienso meyor, estos nin a asesinos lleguen, porque nun peleen frente por frente nin se suiciden nel actu, lo suyo ye'l tiru pel llombu, más fácil y menos peligrosu.
Esperemos qu'estos .... lo que seyan nun seyan quien a facer nada.