DATE AL IMPERIU
Lo más cómodo ye siguir la corriente

Si nun lo veo, nun lo creo. Ayer sábadu, a la nueche, tiréme enriba’l sofá delantre la televisión a ver qué había. Podría habeme quedao col partíu del Madrid pero, nun sé por qué, acabé na TPA porque echaben Terapia de Grupu. Nun ye que seya yo un gran consumidor de televisión, pero viere dalguna qu’otra vez el programa nes sos etapes anteriores y paeciome divertíu, amás de que presta oyer pela tele a daquién falando n’asturianu. Pero lo que vi ayer dexome más d’una hora cola boca abierta, ensin llegar a creyer lo que taba viendo.

Primero hubo una entrevista a Karina. Una moza que nun sé d’onde la sacaren y ún de los personaxes habituales de Terapia facíen entrugues fates a esta cantante de los años sesenta. ¿Qué pinta una cantante como Karina nun programa como Terapia de Grupu? Supongo que rellenar, nun debe ser mui caro trayer a una cantante n’hores baxes. Pero tampoco nun debe dar gran audiencia. Y puestos así, val más dar les perres a  dalgún grupu o cantante que tea empezando, digo yo. Francamente, una entrevista que vi nuna edición pasada al presidente del Madalena de Morcín y a un xugador moldavu que tienen nel equipu paeciome más interesante.

Pero la nueche nun diba dame más que sustos. Aparte d’una edición del chigre nun mui afortunada (non siempre les coses salen igual de bien) la estrella de la nueche ye una especie de Rumbo a la Fama o Operación Triunfu cutre llamada “Yes Mundial”. Así pudi enterame de que nesti concursu hai yá cinco finalistes, tres asturianos, un cántabru y una moza de Ciudá Real. D’estos cinco dos canten en castellanu y tres n’inglés. Alucinante, esto paecía yá una velea nocturna dempués d’una sesión d’alucinóxenos.

La nueche presentaba tres nuevos candidatos a finalistes y, nun lo pierdan. La primera yera una moza cántabra vestida de faralaes que cantaba copla. Nin yo, nin ún de los miembros del xuráu que lo dixo espresamente, salíemos de la dicha velea. Ye que ye pa pensalo: nun programa de la televisión asturiana preséntase una moza de Cantabria que canta coples andaluces vestida de faralaes. De verdá que nun esnifara nada, yera realidá.

Detrás salió un paisanu de Turón que facía música y ruidos varios coles manes y la boca. Gracioso sí, pero pa llegar a la fama un poco escaso. L’home, eso sí, tomábalo too con muncha gracia.

P’acabar, un chaval que supongo andaba necesitáu de los 6.000 euros de premiu por pasar a la final que facía música de lo más estándar tipu 40 principales en karaoke. Visto lo visto, ganador indiscutible.

Si los responsables de la productora o de la TPA queríen cargase ún de los pocos programes mediu decentes que teníen, consiguiérenlo. Enantes, el fútbol y dalgún qu’otru programa como esti animaben l’audiciencia más bien escasa de la TPA. Agora, dempués del ascensu del Sporting a primera, namás-yos queda l’Uviéu y Camín de Cantares (a ver lo que dura).

A la fin van tener razón los que dicíen que la TPA nun yera más qu’un pufu. Planteada así, dende llueu. Yá va munchos años de los teóricos de los medios de comunicación afirmaren que namás hai dos xustificaciones pa idem: el negociu y la utilidá pública (caltener una cultura, por exemplu). Esta tele nuestra, ta claro que negociu nun ye, y la so utilidá pública ¿ónde ta?